عملها بنك الاحتياطي الفيدرالي الأمريكي وخفض سعر الفايدة على الدولار وزي ما توقعنا سوق الدهب داخل على أيام صعبة.. ايه اللي هيحصل في أسعار المعدن الأصفر وليه الخبراء ييأكدوا إنه هيشهد ارتفاعات قياسية وايه الوقت المناسب للاستثمار في الدهب.. التفاصيل كلها هتلاقوها في الفيديو ده خليكم معانا للآخر
رغم حالة الارتياح وتنفس الصعداء في أغلب الأسواق العالمية بعد قرار البنك الاحتياطي الفيدرالي الأمريكي بخفض سعر الفايدة 50 نقطة أساس إلا سوق واحدة هي اللي انقلب حالها ومشيت عكس عقارب الساعة وهي سوق الدهب واللي بتنتعش بقوة في حالة خفض الفائدة على الدولار ودا لأنه مفيش عمار بين الدهب والدولار والاتنين ماشيين عكس بعض لأنهم خيارين متناقضين أمام المستثمرين ولما واحد فيهم بيتأثر وسعره ينزل على طول المستثمرين بيروح على التاني ويشغل فلوسه فيه.
طيب ليه الدهب ماشي عكس الدولار وعكس الأسواق التانية ؟
دا ببساطة حضرتك عشان الدهب بيعتبر الملاذ الآمن للمستثمرين وللبنوك المركزية العالمية في حالة الاضطرابات السياسية والعسكرية ولما الفايدة على الدولار بتقل أو تنزل ودا لأن البنوك المركزية بتخسر جزء من الاحتياطي النقدي بتاعها وهو بيوازي قيمة الانخفاض في العملة الأمريكية اللي اغلب الاحتياطيات العالمية في البنوك المركزية بتتكون منها وطبعا عاوزة تعوض النزيف دا عن طريق شراء كميات ضخمة من الدهب لحفظ قيمة الاحتياطي والتحوط بيه ضد أي تقلبات في الأسواق العالمية الناتجة عن خفض سعر الفايدة.
كمان الطلب بيزيد على الدهب بسبب خسائر المستثمرين في سوق السندات الأمريكية بعد خفض سعر الفايدة والتكالب دا على الدهب من كل ناحية هيخلق حالة من الطلب الشديد مقابل نقص المعروض وبالتالي الاسعار هتقفز عالميا لمستويات قياسية في سوق المعدن النفيس وللاسف بدأت عجلة دوران أسعار الدهب في الدوران وبعد أقل من ساعة على صدور قرار الفدرالي الأمريكي ارتفعت أسعار الدهب إلى أعلى مستوى لها على الإطلاق، وصعد المعدن الأصفر في المعاملات الفورية بنسبة 0.9 بالمئة إلى 2592.39 دولار للأونصة والرقم هيزيد طبعا وفيه توقعات أن الاونصة هتوصل 3 آلاف دولار خلال الفترة الجاية وفيه توقعات تانية بتقول إن أسعار الدهب هتعدي الرقم دا بكتير.
طيب ايه تأثير قرار الفدرالي على سوق الدهب في مصر ؟
اكيد طبعا ليه تأثير مباشر لأن السوق المصري جزء من السوق العالمي واكيد مش هياخد وقت كبير لغاية ما يحصل التأثير دا. رغم حالة الاستقرار النسبي في سوق الدهب المصري بعد قنبلة الفدرالي لكن كل التوقعات بتقول إن الصعود جاي جاي وإن أسعار الدهب هتولع في مصر بسبب اعتماد جزء من السوق المحلي على الاستيراد وطبعا هيستوردوا بالغالي والتوقعات بتقول إن سعر الدهب عيار 21 ممكن يعدي 5 آلاف جنيه قبل نهاية السنة الحالية.
