الدولة حاليا كلها شغالة علي الكهرباء خصوصا إن الفترة اللي حددها مجلس الوزراء لوقف خطة تخفيف الأحمال فاضل لها ايام وتخلص..، ياتري اية هيا بدائل الحكومة لعدم عود قطع الكهرباء وهل الكهرباء هترجع تقطع تاني زي زمان ولا اية الحكاية
طلعنا هنا لحضراتكم من كام يوم وقلنا أن الدولة حاليا بترتب اوراقها علشان ترجع تطبيق خطة تخفيف الأحمال مرة تانية، والكهرباء هترجع تقطع الكهرباء من تاني خصوصا أن المدة اللي حددها مجلس الوزراء لوقف تخفيف الأحمال واللي بدأت في الـ21 من يوليو اللي وهتستمر لحد نصف شهر سبتمبر الحالي قربت تنتهي، والدولة شايفة أن ارتفاع ظاهرة سرقة الكهرباء هيا السبب الاساسي في مشكلة تخفيف الأحمال .
طيب اية اللي بيحصل في الكواليس دلوقتي علشان الدولة مترجعش تقطع الكهرباء مرة تانية علي الناس؟.
امبارح الدكتور محمود عصمت وزير الكهرباء والطاقة المتجددة، عمل اجتماع مع رؤساء شركات توزيع الكهرباء على مستوى الجمهورية لمتابعة خطة العمل فى كل شركة والإجراءات اللى بتعملها الشركات لمواجهة الفقد الفنى والفقد التجارى وظاهرة سرقة التيار الكهربائي بالتعاون والتنسيق مع شرطة الكهرباء ولجان المتابعة والمرور بالشركة القابضة والوزارة، ونتائج الأعمال في الشهرين اللي فاتو لتحسين جودة التغذية ومواجهة التعدى على الكهرباء والكمية اللي تم استردادها وأبرز الحالات اللى تم ضبطها والإجراءات اللى تمت فى مواجهة سارقى الكهرباء .
اجتماع وزير الكهرباء مع رؤساء شركات التوزيع ناقش برضوا معدلات الفقد وضرورة المقارنة بين اجمالى الطاقة فى شركة النقل والطاقة المستلمة والمباعة فى شركات التوزيع والمرور ومراجعة موقف العدادات المعطلة والعدادات مسبقة الدفع ، والمقارنة بين عدد محاضر سرقة الكهرباء اللى تم تحريرها وما تم تحصيله فعليا، وكمان تم مراجعة الخطة الاستثمارية لكل شركة وخطط الصيانة والتوقيتات المحدده لقياس الأحمال للكابلات والمحولات وقياس نقاط الربط مع محولات نقل الكهرباء .
وزير الكهرباء شدد خلال الإجتماع علي الشركات بإعداد تقرير أسبوعى يشمل ضبطيات سرقة الكهرباء وتركيب العدادات الكودية، وكميات الوفر فى الطاقة ومعدلات التحصيل وعمل خريطة مكانية لرصد المناطق الى بيزيد بها نسب الفقد التجارى وإمكانية تركيب العدادات المجمعة لأكشاك التوزيع واللوحات ، والإجراءات اللازمة للارتقاء بمستوى الخدمات المقدمة للمواطنين والتصدي لسرقات التيار الكهربائي ومنع الوصلات الغير قانونية واللي يينتج عنها أضرار بالغة للشبكة الكهربائية، وطالب الشركات بتشكيل فرق للمرور والتفتيش من الشركة القابضة ومن الوزارة لمتابعة كل الموضوعات المتعلقة بسرقة الكهرباء وخفض الفقد واجراءات تحسين الخدمة ومعدلات تركيب العدادات الكودية .
الدكتور عصمت قال أن في متابعة يومية من القيادة السياسية للاجراءات اللي بيتم اتخاذها للحد من ظاهرة سرقة التيار الكهربائي، واكد أن نسب الفقد الناتج عن سرقات التيار الكهربائى بتكبد الدولة خسائر مالية كبيرة، ده غير الإضرار اللي بتسببه لاستقرار الشبكة نتيجة دخول أحمال مفاجئة غير مخطط لها تتسبب في انقطاع التيار الكهربائي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
