معاك فلوس زيادة وبتفكر تشتري دهب.. النهاردة فرصتك الأخيرة.. ليه بنقول كده وايه اللي هيحصل في سوق الدهب العالمي والمصري يوم التلات اللي جاي.. خليكم معانا للآخر وهتعرفوا التفاصيل في الفيديو ده .
من فترة كبيرة بنقولكم هنا في بانكير إن الدهب استثمار مضمون ومربح وكل ما اشتريت بدري كل ما مكسبك هيزيد وقلنا كمان إن الأيام والشهور الجاية هتكون للدهب ولغاية 2026 ودا اللي بيحصل دلوقتي في الأسواق العالمية واللي قفز فيها السعر لارقام قياسية جديدة وسجلت عقود الدهب الآجلة 2606 دولار للأوقية يعني داخلة برجلها اليمين على حاجز ال3000 دولار زي ما سبق وقلنا أنه هيوصل للسعر دا في الشهور الأخيرة من 2024 وسجل سعر المعدن الأصفر في
المعاملات الفورية في الساعات الأخيرة 2580 دولار للأوقية ودا كان ليه انعكاسات كبيرة على الأسواق العالمية وطلعت دراسات بتحذر من تسونامي أسعار في سوق الدهب الدولي ومنها توقعات بنك UBS واللي قال إن الدهب زاد سعره بنسبة 23% في الكام شهر اللي فاتوا من 2024 ودي اعلى أسعار بيسجلها الإطلاق وتوقع مزيد من الزيادة في الأسعار.
طيب ايه سبب ارتفاع أسعار الدهب ؟
زي ما قلنا قبل كده فيه أسباب كتير تخلي الدهب يرفع ويزيد وأولها توقعات انخفاض العوائد الأمريكية وخفض بنك الاحتياطي الفيدرالي الأمريكي لسعر الفايدة في اجتماعه يوم التلات الجاي ودا بخلاف استمرار توجه البنوك المركزية لتنويع استثماراتها بعيدا عن الدولار مع أنباء خفض سعر الفايدة وانخفاض سعر العملة الأمريكية ولان البنوك المركزية العالمية عاوزة تحافظ على قيمة الاحتياطي بتاعها فاتجهت لشراء الدهب بكميات كبيرة في الفترة الأخيرة ودا اللي أعلنته اغلب البنوك المركزية الكبيرة في العالم ودا خلق زيادة كبيرة ومستمرة على الطلب في سوق المعدن النفيس وبالتالي سعره زاد بالشكل دا ولسه هيزيد.
كمان تقدر تضيف على الأسباب اللي فاتت لارتفاع سعر الدهب التوترات والصراعات السياسية والاقتصادية والعسكرية في العالم واللي صنعت حالة اضطراب كبيرة في الأسواق العالمية بشكل عام وخلت الحاجة لتخزين الدول للدهب ملحة جدا كإجراء تحوط بالملاذ الآمن وهو الدهب وكمان فيه سبب تاني وهو ثبات المعروض من المعدن الأصفر وارتفاع تكلفة استخراجه ودا اللي قالته شركات التنقيب عن الدهب الكبرى في العالم يعني احنا قدام طلب كبير وبيزيد كل يوم ومعروض ثابت وبيقل كمان.
طيب ايه العمل وايه اللي هيحصل في سوق الدهب في مصر الفترة الجاية ؟
الحقيقة التوقعات صادمة لأسعار الدهب في الصاغة المصرية في الفترة الجاية ودا لأن مصر جزء من السوق العالمي والتوقعات بتقول إن أسعار الدهب عندنا هتزيد بشكل كبير وإن جرام 21 المنتشر في مصر هيوصل سعره ل5 آلاف جنيه وممكن يعدي الرقم دا ولو فاكرين دا اللي قلناه هنا من حوالي شهرين .
الافضل ليك دلوقتي انك تشتري دهب حتى لو سعره غالي لكن هيكون اغلي بكتير في الشهور الجاية والنصيحة انك تستثمر في الجنيهات والدهب والسبايك لأنها اكتر أنواع بتحافظ على قيمتها عند البيع مقارنة بالمشغولات الدهبية
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
