ايه رايك في مشروع لو حطيت في جنيه يتردلك 10؟.. لا وايه انت كل اللي هتحتاجه عشان تفتحه علبة كانز.. لكن ايه تفاصيل المشروع ده؟ وازاي تكسب من وراه كل المبلغ ده؟ وايه اهم شرط لازم تعمله عشان تنجح؟ كل ده هتعرفه لو تابعتني في التقرير التالي.
بيزنس علب الكانز مشروع مش جديد ولا حاجة وناس كتير بتشتغل فيه، لكن الجديد في اللي هقولك عليه انهاردة وهي أرباحه اللي بتوصل لملايين الجنيهات واللي ممكن تحققها بكل سهولة لو طبقت الحاجات دي، لكن ايه التفاصيل؟
التفاصيل مع السيد خضر الخبير الاقتصادي، اللي قال ان إعادة تدوير النفايات دلوقتي من المشروعات المهمة جدا، وخصوصا مشروع علب الكانز وده فكرته مناسبة جدا لشباب كتير لانه مش هيحتاج منك راس مال كبير ده غير أن الدولة ممكن تشجعك بقرض عشان تفتحه لان من المشروعات الصغيرة
بس عشان تضمن نجاح مشروعك وتكسب منه أعلى مبلغ لازم تخلي بالك من شوية حاجات زي انك تختار عمالة مدربة وشاطرة، لأن الموضوع مش مجرد انك تحولها لأشكال تانية
ولازم كمان تختار معدات كويسة مش اي حاجة وخلاص، وخصوصا المكابس ودي اهم حاجة في المشروع عشان كده بتتباع بمبالغ كبيرة جدًا، ودي بقى اللي بتحول علب الكانز لأجزاء صغيرة جدًا، بعدين لمواد خام بودر
وفي الاخر بتتشكل لحاجات تانية تتباع في الأسواق المحلية والعالمية، عشان توفر عملة صعبة، يعني الموضوع كبير اوي ومكسبه بالدولار.
عشان كده لازم تجهز للمشروع كويس اوي قبل ما تبدء عشان متخسرش لان مش معنى إن في مشروعات أرباحها مضمونة، إنها هتفضل ناجحة على طول، لأ في معايير وأسس لازم تتعمل بشكل مظبوط
زمانك بتسال دلوقتي تكاليف المشروع وارباحه كام؟
اقولك ياسيدي مشروع الكانز بنقول عليه مشروع الدهب الأسود، لأن الشخص مهما دفع في المشروع، فهيجيب ليه أرباح عالية جدًا، تفوق كل توقعاتك، لأنها ممكن توصل ل10 أضعاف اللي دفعته
يعني مثلا لو اتكلف المشروع في حدود 500 ألف جنيه، فكده هتكون ارباحك 5 مليون جنيه، ولو عملت المشروع بمليون جنيه هيجليلك أرباح بـ10 مليون جنيه
وعلى فكرة من مميزات مشروع علب الكانز انه مادة متوفرة وسهلة انك تلاقيها يعني مش هتحتاج تستورد اي خامات بالإضافة أن تكلفتها بسيطة مقارنة باي مشروع تاني .
يعني مبلغ 500 ألف جنيه أو 400 ألف جنيه مناسب جدا انك تبدء بيه وده اصلا تكلفة مشروع متوسط أو صغير
للشباب، ده غير أنه بيحافظ على البيئة، وبيدعم المشروعات الصغيرة، وخصوصا إذا كانت موادها الخام ومتوفرة بشكل كبير جدًا.
